Ýaş ilçileriň ilkinji önümli aýlary

  Durnukly ösüş maksatnamalarynyň ýaş ilçileriniň ikinji aýy, iýul aýy hem tejribelere baý önümli aý boldy...
  Bu aýyň altysyna Birleşen Milletler Guramasynyň Baş sekretary Antoniu Guterriş iş sapary bilen Türkmenistana geldi we hormatly Prezidentimiz Serdar Berdimuhamedow, Milli Liderimiz Gurbanguly Berdimuhamedow we ýurduň ýokary wezipeli wekilleri bilen duşuşdy. Duşuşyklardan soňra Jenap Antoniu Guterriş Türkmenistandaky BMG-nyň täze binasynyň açylyş dabarasyna gatnaşdy we şol dabara gatnaşan biz ýaş ilçiler bilen aýratynlykda salamlaşyp bizi has hem ruhlandyrdy.

  Ondan başgada, bilşiňiz ýaly howanyň üýtgemegi global ýagdaýda uly meseleleriň biri. Bu meseläniň üstünde Türkmenistan ýurdumyzda hem işler alnyp barylýar. Ol işleriň biri bolsa Ýaşlaryň Ýerli Konferensiýasy (LCOY). Bu konferensiýanyň esasy maksady ýurdumyzyň welaýatlaryndaky ýaşlar bilen duşuşyp olaryň Howanyň üýtgemegi hakyndaky bilimini artdyrmak we olar bilen bu mesele hakynda pikir alyşmak. Bu ýylyň sentýabr aýynda geçiriljek Ýaşlaryň Ýerli Konferensiýasyna hem taýýarlyklar uly depginde dowam edýär. Iýul aýynyň ýigrimi üçine Türkmenistanyň Bilim ministrliginde Konferensiýa taýýarlyk maslahaty geçirildi. Maslahatda daşky gurşaw meseleri we Ýaşlaryň Ýerli Konferensiýasynda çykyş ediljek mowzuklar barada gürleşildi. Maslahatda Ýaş Ilçileriň bu mesele hakyndaky pikirlerine we etjek işlerine aýratyn üns berilýändigi duýduryldy. Ýaş Ilçiler bu mesele bilen içgin gyzyklanyp ony öwrenýärler. 

  Muňa şaýatlyk hökmünde Ýaş Ilçilerimizden ikisiniň sentýabr aýynda Gyrgyzystan respublikasynda geçiriljek Klimatyň üýtgemegi hakynda Ýaşlaryň sebitleýin Konferensiýasyna (RCOY) gatnaşmaga çakylyk gelendigini aýdyp bileris. Bu çakylyk ähli  Ýaş  Ilçileri begendirdi we olary has hyjuwly işlemeklik üçin ruhlandyrdy.

Makalany ýazanlar: Enejan Nedirowa we Baýnazar Muhammedow, Durnukly ösüş maksatnamalarynyň ýaş ilçileri.