HALKYMYZYŇ AGZYBIRLIGI – ÖSÜŞLERIMIZIŇ GÖZBAŞY

Halkyň beýikligi, döwletiň kuwwaty onuň agzybirliginde, özara düşünişmeginde, umumy maksatlaryň daşynda jebisleşip bilmeginde ýüze çykýar. Türkmen halkynyň asyrlaryň jümmüşinden geçip, öz milli keşbini, ruhy gymmatlyklaryny we döwletlilik ýörelgelerini aýawly saklap gelmeginiň esasy sebäpleriniň biri-de agzybirlik ýaly mukaddes düşünjäniň jemgyýetçilik durmuşynda aýratyn orny eýelemegidir. Çünki jebislik bar ýerinde ynam bolýar, ynam bar ýerinde maksada okgunly hereket döreýär, umumy maksat bolan ýerde bolsa, ösüşiň berk binýady tutulýar. Şu nukdaýnazardan, türkmen halkynyň agzybirligi ata-babalarymyzdan miras galan, häzirki nesiller tarapyndan dowam etdirilýän hem-de geljekki nesiller üçin ygtybarly ýol görkeziji bolup hyzmat edýän ruhy gymmatlykdyr. Halkymyzyň durmuşynda agzybirlik düşünjesi maşgala ojagyndan başlap, jemgyýetiň giň gatlaklaryna çenli öz beýanyny tapypdyr. Öýüň töründe ýaşula hormat goýmak, kiçä hemaýat etmek, dogan-garyndaş bilen ysnyşykly gatnaşyk saklamak, goňşynyň derdine ýetişmek, toý-tomgada, kynçylykda bile bolmak ýaly asylly däpler halkymyzyň durmuş ýörelgesiniň aýrylmaz bölegine öwrülipdir.
Halkymyzyň taryhy hem jebisligiň döwletlilik bilen aýrylmaz baglanyşyklydygyny görkezýär. Dürli döwürlerde başdan geçirilen synaglar, durmuş kynçylyklary we taryhy öwrülişikler milletiň ruhy bitewüliginiň näderejede möhüm güýje eýedigini subut edipdir. Türkmeniň mertligi, sabyrlylygy, özara goldawy, il-günüň bähbidini şahsy isleglerden ýokarda goýmagy nesilleriň aňynda berk orun alypdyr. Şu gymmatlyklar häzirki döwürde hem Arkadagly Gahryman Serdarymyzyň parasatly ýolbaşçylygy netijesinde öz ähmiýetini baýlaşdyryp, Garaşsyz Watanymyzyň ösüşleriniň ruhy esaslarynyň birine öwrüldi. Agzybir jemgyýetde her bir adam özüni umumy işiň bir bölegi hökmünde duýýar, öz zähmetiniň diňe şahsy bähbit üçin däl-de, eýsem tutuş ýurduň geljegi üçin möhümdigine düşünýär. Şeýle düşünje bolsa, döredijiligiň, jogapkärçiligiň we maksada okgunlylygyň güýjüni artdyrýar.
Garaşsyz, baky Bitarap ýurdumyz üçin halkyň jebisligi aýratyn ähmiýete eýedir. Eziz Diýarymyzda dürli ugurlarda durmuşa geçirilýän giň gerimli özgertmeleriň, täze önümçilikleriň, döwrebap şäherleriň, medeni we durmuş maksatly desgalaryň, bilim we ylym ulgamyndaky ösüşleriň aňyrsynda halkymyzyň yhlasly zähmeti dur. Her bir üstünlik halkymyzyň agzybir tagallalarynyň netijesidir. Şonuň üçin, ýurdumyzda gazanylýan her bir täze sepgit halkyň agzybirliginiň durmuşdaky aýdyň netijesi hökmünde kabul edilmäge mynasypdyr.
Häzirki zaman dünýäsinde ösüşiň depgini bilen birlikde jemgyýetiň öňünde duran wezipeler hem çylşyrymlaşýar. Ykdysady bäsdeşlik, ylmy-tehniki ösüş, maglumat giňişliginiň giňelmegi, täze hünärleriň döremegi we halkara gatnaşyklarynyň ösmegi adamdan täzeçil pikirlenmegi talap edýär. Şeýle şertlerde jemgyýetiň içki jebisligi aýratyn ähmiýete eýe bolýar. Bir maksada gönükdirilen jemgyýet täze mümkinçilikleri has çalt özleşdirýär, ýüze çykýan kynçylyklara has ynamly garşy durýar we geljek üçin uzak möhletli maksatlary amala aşyrmaga ukyply bolýar. Türkmen halkynyň agzybirligi hem, ösüşiň şu häzirki zaman talaplaryna jogap berýän güýçleriniň biridir. Çünki özara ynamly we jebis jemgyýetde täze pikirleriň döremegi, başlangyçlaryň goldanylmagy we umumy bähbitleriň ileri tutulmagy üçin amatly şertler emele gelýär.
Ýaşlar barada aýdylanda bolsa, agzybirligiň geljekki ykbaly hut şol nesliň düşünjesine we hereketine baglydyr. Häzirki ýaşlar ýurdumyzyň ösüşlerine işjeň gatnaşýan, döwrebap bilimleri özleşdirýän, täze tehnologiýalardan baş çykarýan, dünýäniň öňdebaryjy tejribelerine gyzyklanýan nesildir. Olaryň kalbynda watansöýüjilik, milliligimize bolan buýsanç, döredijilik hyjuwy we jemgyýete peýdaly bolmak islegi näçe berk bolsa, halkymyzyň agzybirliginiň geljekki binýady hem şonça mäkäm bolar.
Halkymyzyň agzybirligi – biziň geçmişden alan iň gymmatly miraslarymyzyň biri, şu günümiziň güýçli daýanjy we geljegimiziň ygtybarly kepilidir. Jebislik bilen döredilen her bir işiň ömri uzak, umumy maksada gönükdirilen zähmetiň netijesi bolsa, has bereketli bolýar. Halkyň ýüreginde Watana bolan söýgi, geljege bolan ynam bir ýere jemlenende, öňde goýlan islendik maksada ýetmek mümkin. Goý, türkmen halkynyň asyrlaryň dowamynda kemala getiren jebislik ruhy hemişe rowaç alsyn, her bir maşgala ojagynda agzybirligiň ýylylygy, jemgyýetimizde özara hormatyň we ynamyň güýji höküm sürsün. Çünki halkyň agzybirligi bar ýerinde – döwlet kuwwatly, maksatlar aýdyň, ösüşler bolsa rowaç bolýar.

Mira ARTYKOWA,
Türkmenistanyň Tebigaty goramak jemgyýetiniň
Daşoguz welaýat bölüminiň hünärmeni.