TEBIGATY GORAMAK — SAGLYGY GORAMAKDYR

Adam saglygy bilen tebigatyň arasyndaky baglanyşyk örän ýakyndyr. Tebigatyň ýagdaýy, howanyň hilinden başlap, suw serişdeleriniň arassalygyna çenli köp faktorlar adam bedeniniň we ruhy ýagdaýynyň ýagdaýyna gönüden-göni täsir edýär. Şu günki gün ekologik meseleleriň ösmegi saglyk meseleleriniň artmagyna getirýär we munuň öňüni almak üçin tebigaty goramak işlerini güýçlendirmek zerurdyr.
Adam organizmi üçin iň möhüm elementleriň biri howa bolup, onuň hili saglyk üçin möhüm rol oýnaýar. Aýratyn hem iri şäherlerde we senagat zolaglarynda howanyň hapalanmagy dem alyş ýollarynyň kesellerini, allergiýalary we ýürek-damar kesellerini artdyrýar. Kislorod ýetmezçiligi we hapalanan howa astynda uzak wagtlap ýaşamak adamyň ýürek we dem alyş kesellerinden ejir çekmegine sebäp bolýar.
Suw adam bedeniniň 70%-ini emele getirýär we onuň arassalygy saglyk üçin möhüm şertdir. Suwda bolan hapalar, bakteriýalar we himiki maddalar ýaralara, içegä, deri kesellerine we beýleki dürli ýokançlyklara getirip bilýär. Öýde we jemgyýetde arassa suwy üpjün etmek ekologiýa goragy bilen gönüden-göni baglanyşyklydyr.
Tebigy ýerler, tokaýlyklar we göller adamda stres we aladalary azaltmakda, ruhy rahatlygy üpjün etmekde uly ähmiýete eýedir. Çölleşmegiň ýa-da tebigatyň bozulmagynyň netijesinde, bu amatlylyklar azalmaga başlaýar, adamda dürli psihologiki we fiziki keselleriň döreme howpy ýokarlanýar.
Tebigaty goramak, arassa howa we suw, tebigy iýmit serişdelerini tygşytly ulanmak adamlaryň saglygyny goramak üçin esasy şertdir. Plastiki zibiliň, zyýanly gazyň we himiki serişdeleriň ulanylmagynyň azaldylmagy, ekologiýa taýdan arassa durmuşyň ösdürilmegi adamlaryň saglyk derejesiniň ýokarlanmagyna getirýär.
Adam saglygy bilen ekologiýanyň arasyndaky çylşyrymly we ýakyn baglanyşyk sebäpli, tebigaty goramak – diňe bir gözellik ýa-da daşky gurşaw meselesi däl, eýsem adamzadyň sagdyn ýaşaýşy üçin zerurlykdyr. Her birimiz tebigaty goramak bilen, öz saglygymyzy hem goraýarys. Geljek nesiller üçin arassa we sagdyn dünýä döretmek biziň borjumyzdyr.

Allaberdi SARYKOW,
Daşoguz şäher hassahanasynyň KAIG-niň başlygy.