SALAM, ÝOLDAŞ MUGALLYM!

Mugallymçylyk diňe bir hünär däl, eýsem, ynsan ruhunyň ösüşine ýol açýan, jemgyýetiň geljegini gurýan mukaddes we jogapkärçilikli kärdir. Mugallymlar adamzadyň bilim hazynasyny nesilden-nesle geçirýän, her bir ynsanyň durmuşynda iň möhüm şahslaryň biri bolup durýarlar.
Mugallym – diňe bir ylmy öwretmek bilen çäklenmän, eýsem, ahlak, edep-terbiýe, watançylyk, ynsanperwerlik ýaly mukaddes düşünjeleri hem ýetirmegi başarmalydyr. Ol okuwçylaryň, talyplaryň aňyny açýan, olara durmuş ýolunda dogry ýol görkezýän şahs bolup durýar. Mugallymlar jemgyýetiň ruhy we akyl derejesini ýokarlandyrýarlar, täze pikirleri, ylmy açyşlary we tehnologiýalary nesillere ýetirýärler. Hormatly käriň eýeleri milli we ahlak gymmatlyklarynyň goragçylarydyr. Olar her bir halkyň medeni mirasyny, taryhyny we edebiýatyny geljekki nesillere ýetirýärler. Mugallymlar jemgyýetiň ösüşine gönüden-göni täsir edýän adamlardyr. Olar ylmyň, tehnologiýanyň, medeniýetiň we ahlagyň ösüşine itergi berýän ruhy ýolbaşçylardyr. Şeýle-de, olar il içinde uly hormata mynasyp bolup, halk tarapyndan hemişe hormat bilen garalýan we sylaglanýan şahslar bolup durýarlar.
Her bir okuwçynyň, talybyň dünýägaraýşyna täsir etmek üçin mugallymyň sabyrly we söýgüli bolmagy zerurdyr. Mugallym hemişe öz bilimini artdyrmaly, täze usullary we tehnologiýalary özleşdirmelidir.
Mugallymçylyk iň mukaddes we iň jogapkärli kärleriň biridir. Çünki her bir uly şahsyýet bir mugallymyň elinde terbiýelenip, jemgyýete hyzmat etmäge taýýarlanýar. Şonuň üçin hem, mugallymlar jemgyýetiň geljegini gurýan çyralar bolup, olaryň mertebesi elmydama belent bolmalydyr.
Mugallymlar diňe bir bilim berýän adamlar däl – olar jemgyýetiň geljegini gurýan ruhy ýolbeletlerdir!

Galpak GALPAKOW,
Daşoguz welaýatynyň Daşoguz şäheriniň daşary ýurt dillerine
ýöriteleşdirilen 14-nji orta mekdebiniň okuw işleri boýunça orunbasary.