Tebigatda her bir zat-diňe özüne mahsus zady döretmäge ukyplydyr

“Tebigatda her bir zat-diňe özüne mahsus zady döretmäge ukyplydyr.”
Çarlz Darwin.

Döredijilik- ynsan göwnüniň sudura giren keşbi bolansoň, eseriň “tagamyny almak” üçin ilki bilen awtoryň göwün ýaýlasynyň “howasyny” duýmak zerurdyr.

Sen şeýle kiçiňiň hem şeýle giňdiň 
Bu gün bolsa buz üstünde lowlaýaň 
Gözüň görejinde ýer tapan Göwün 
Neçün giň jahana sygmajak bolýaň 

Ýatlamalaň dünýesinde ylgaşlap  
Surnugaňda arzuw a:tly salgymdan  
Gyrtyç basan köne güzeriň taşlap  
Torgaý bolup galgap gaýtdyň ýaýlamdan
 

Haýsy çeşmelerden ruhuň gandyryp  
Sen haýsy güýçlerden ylham alýarsyň 
Meniň ak ganatly owadan Göwnüm-  
Golumdan göterip arşa galýarsyň 
 

Soň ýüzýäris arşyň gök ummanynda  
Meleklere, Çiltenlere garylyp  
Taňryň huzuryna edýäris tagzym
“Alhamyň”  nurundan ak pata alyp

Dergähiňde bir arzym bar Ýaradan  
Jyda kylma meni perden-ganatdan
Perişde ganatly-perwazly göwnüm  
Dowam halasgär sen ol kyýamatdan  

Çeşmäň suwy ýaly dury gözleriň  
Meniň diriligim meniň bakyýam
Bu yklymda sen ýeke-täk islegim
Hem ikilik çykmaz ýeke-täk dünýäm

Ýöne, senem gitme meni terk edip
Sensiz kerwen göçen boş saraýam men
Seniň ganatlaryň ýüzüm ýelpese
Seň yhlasyň bilen boý alaryn men  
 

Sen-sen şadillileň şabram şelpesi
Seň baryňda meň dünýämde gussa ýok
O-ol pelegiň salyp giden yzasyn
Seýikläre senden beýik ussa ýok

Arzuwlaryň ak bedewin säpjedip
Ýör ýene çykaly arşyň saparna
Ýedi gat asmanyň çür depesinde
Guwanaýyn seniň ganat kakarňa

Sen ne gudrat sen ne beýle keramat  
Owazna gark edip dokuz pelegiň
Alyp barýaň arasyndan gaýdyryp
Gaýyşy deý, ýele düşen ýelegiň

Sap-sap bolup galyp barýar dünýeler 
Gaýdyp ýetilmejek menzile meňzäp  
Men bolsam owaza barýan tirkelip
Owazyň özünden müň kerem ýeňläp 
Ýöne...
Pelek gerdişini gerdene salyp
Süňňüňi sökende bogunma bogun
Neneň edip çydabildiň çagşaman
Arşmydyň sen kürsmüdiň sen eý Göwün!

Men seni asmanyň arşynda gördüm
Keremli daglaryň gerşinde gördüm 
Jemşidiň jamynda-käşinde gördüm 
Dogamy sen, jadymy sen eý Göwün!

Hakdan içen diwanalaň kasamyn-  
Haklaýşy deý saňa wepa haklaryn  
Eý, meniň perwazly, perişde Göwnüm  
Men seni bakyýa tämiz saklaryn!

Meniň pikirimçe: Sungat, durmuşa düşünmegiň açary bolup, onuň täsirinden döreýän  soraglara agtarylýan jogap, ýetilýän many-durmuşa düşünmegi aňladýar...