Kim bolmaly, kime meňzemeli, jemgyýetde öz ornuňy nähili tapmaly?

Dünýäde her bir adam özboluşly. Her kimiň ýüreginde geljege bolan uly arzuwlar, belent maksatlar bar. Emma gynansakda häzirki käbir ýaşlaryň geljekde öňünde goýan maksady ýok, öz şahsy tejribäme esaslanyp käbir özümden kiçi we özüm bilen deň-duş adamlar bilen söhbetdeş bolup görenimde olara şeýle sorag berdim.
- Sen geljekde kim bolmakçy?
- Öňüňde goýan inniki maksadyň näme? 
Alan jogaplarym bolsa:
- "Aý göreris maňlaýdyr näme iş dogry gelse şoňa görä bolarys", "Okuwy bir gutaraýyn onsaň pikirlenip görjek", "Bu wagt hezilä herkimiň edişi ýaly daşary ýurda giderin", "Diplomymy alansoň nirä goýsalar şo ýerde işlejek" we ş.m

Ýaşlyk döwründe adam “Men kim bolmaly?”, “Kime meňzemeli?”, “Jemgyýetde öz ornumy nähili tapmaly?” diýen soraglara jogap gözlemeli. Dogry ýoluny tapmak üçin bolsa nämä üns bermeli? Geliň, bu meseleleriň üstünde durup geçeliň.

Özboluşlylygyňy gorap sakla!

Käwagt adamlar meşhur şahsyýetlere, üstünlik gazanan adamlara meňzemäge çalyşýarlar. Olaryň gowy taraplaryny öwrenmek peýdaly, emma her kimiň öz aýratynlygy bar. Şonuň üçin ilki bilen, özüňi tanamagyň möhümdigini unutma!

- Seni näme gyzyklandyrýar?
- Haýsy işleri ýerine ýetireniňde özüňi bagtly duýýarsyň?
- Haýsy aýratynlyklaryň bilen beýlekilerden tapawutlanýarsyň?

Şu soraglara jogap bermek, öz ýoluňy tapmaga kömek eder. Ýönekeýje bir mysal: käbir adamlar sungata höwes bildirýär, beýlekiler tehnologiýa ýa-da biznes bilen gyzyklanýar. Eger-de öz gyzyklanmalaňy dogry tanasaň, seniň durmuş ýoluň hem şonuň bilen baglanyşykly bolar.

Öwrenmekden we kämilleşmekden hiç wagt boýun gaçyrma!

Başarnygyňy ösdürmek, täze zatlary öwrenmek adam üçin iň möhüm ýörelgeleriň biridir. Şonuň üçin öz ugruňy kesgitlänsoň, şol ugurda ösdürilmegi maksat edin!
- Kitap oka,
- Ussat adamlaryň tejribesinden öwren,
- Gyzyklanýan ugryň boýunça kurslara, okuwlara gatna,
- Özüňi synap görmäge gorkma!
Uly üstünlikler hiç wagt tötänden gazanylmaýar. Uzak we yzygiderli işlenýän zähmet, özüňi kämilleşdirmek bilen gazanylýar. Ilkinji ädimler bolsada şowsuz, inniki ädimler bolmaýar şonsuz diýişleri ýaly täze zatlary öwrenmäge we tejribe toplamaga çalyş!
Jemgyýetde her kimiň öz orny bar. Kim mugallym, kim lukman, kimi telekeçi bolup, jemgyýete peýdaly bolmaga çalyşýar. Sen hem öz ýoluňy tapyp, jemgyýet üçin peýdaly adam bolmagyňy meýilleşdirmelisiň. Munuň üçin:
- Adamlar bilen dogry aragatnaşyk sakla,
- Daş-töweregiňde bar bolan mümkinçiliklerden peýdalan,
- Hereket et!

Ýaşlyk – mümkinçilikleriň iň giň döwrüdir. Sen islendik ugry saýlap bilersiň, islendik ugurda üstünlik gazanyp bilersiň. Esasy zat, özüňi tapmak, özüňe ynamly bolmak we maksadyňa tarap hereket etmekdir. Bu pikirler meniň öz şahsy garaýşym we hemme adamyň durmuşda maksady ýok diýip bilmeris, esasy zat ýaşlara dogry ýoly salgy bermek üçin maslahat bermek!