BITARAPLYK WE PARAHATÇYLYK BAŞLANGYÇLARY – TÜRKMENISTANYŇ HALKARA ABRAÝYNYŇ BERK BINÝADY

Häzirkizaman dünýäsi çylşyrymly syýasy, ykdysady we ynsanperwer meseleleriň ýüze çykýan döwrüni başdan geçirýär. Şeýle şertlerde döwletleriň halkara gatnaşyklarynda eýeleýän ornuny kesgitleýän esasy ölçegleriň biri olaryň parahatçylygy, howpsuzlygy we durnukly ösüşi üpjün etmek ugrunda alyp barýan syýasatynyň mazmuny bilen kesgitlenýär. Şu nukdaýnazardan garalanda, Türkmenistanyň hemişelik Bitaraplyk hukuk derejesine esaslanýan daşary syýasaty dünýä jemgyýetçiliginiň ünsüni özüne çekýän netijeli diplomatik ugurlaryň biri hökmünde çykyş edýär. Bu syýasat diňe bir ýurdumyzyň milli bähbitlerini goramak bilen çäklenmän, eýsem umumadamzat gymmatlyklarynyň dabaralanmagyna, halklaryň arasynda özara ynamyň pugtalandyrylmagyna hem gönükdirilendir.
Türkmen Bitaraplygy halkara gatnaşyklarynda aýratyn bir syýasy mekdep hökmünde kemala geldi diýip arkaýyn aýdyp bileris. Sebäbi bu ýörelge ýyllaryň dowamynda diňe bir syýasy garaýyş hökmünde däl-de, eýsem iş ýüzünde öz netijeliligini subut eden parahatçylyk döredijilik taglymatyna öwrüldi. Ýurdumyz halkara meseleleriň çözgüdinde güýç ulanmak ýa-da garşylyk döretmek usullarynyň ýerine gepleşikleri, özara hormaty we deňhukukly hyzmatdaşlygy ileri tutýar. Hut şu çemeleşme hem, Türkmenistanyň dünýä döwletleriniň arasynda ynamdar hyzmatdaş hökmünde ykrar edilmegine mümkinçilik döredýär.
Soňky ýyllarda ýurdumyz tarapyndan öňe sürülýän halkara başlangyçlaryň mazmuny hem parahatçylyk döredijilik syýasatynyň giň gerimlidigini görkezýär. Ulag diplomatiýasy, energetika howpsuzlygy, howanyň üýtgemegi bilen bagly meseleler, durnukly ösüş maksatlaryna ýetmek ugrunda halkara hyzmatdaşlygyň ösdürilmegi ýaly ugurlarda öňe sürülýän teklipler dünýä jemgyýetçiliginiň goldawyna eýe bolýar. Bu başlangyçlaryň aýratynlygy olaryň haýsydyr bir sebit ýa-da topar üçin däl-de, tutuş adamzadyň bähbitlerine hyzmat etmegidir.
Türkmenistanyň parahatçylyk başlangyçlarynyň ähmiýeti diňe halkara resminamalarda ýa-da diplomatik duşuşyklarda däl, eýsem halklaryň arasynda ynsanperwer gatnaşyklaryň ösdürilmeginde hem aýdyň görünýär. Eziz Diýarymyz dürli döwletleriň halklaryny özara ýakynlaşdyrýan medeni çäreleriň, halkara forumlaryň we maslahatlaryň geçirilýän möhüm merkezleriniň birine öwrüldi. Şeýle çäreler dürli medeniýetleriň arasynda düşünişmegi berkitmäge, dostluk köprülerini gurmaga hem-de umumy ösüşiň maksatlaryny kesgitlemäge ýardam berýär.
Türkmenistanyň hemişelik Bitaraplygy häzirki döwürde ýurdumyzyň ösüş strategiýasynyň möhüm bölegine öwrüldi. Bu syýasat ykdysady hyzmatdaşlygyň giňelmegine, maýa goýumlaryň çekilmegine, halkara abraýyň ýokarlanmagyna we sebitde durnuklylygyň pugtalandyrylmagyna ýardam berýär. Şeýlelikde, türkmen Bitaraplygy diňe bir milli ösüşiň däl, eýsem dünýäde parahatçylyk medeniýetiniň berkemeginiň hem möhüm şertleriniň biri bolup çykyş edýär.
Dünýäde parahatçylygyň gymmatynyň has-da ýokarlanýan häzirki döwründe Türkmenistanyň Bitaraplyk syýasaty öz ähmiýetini artdyrýar. Bu syýasat ynsanperwerligiň, hoşniýetliligiň we özara düşünişmegiň baýdagy bolup, halkara hyzmatdaşlygyň täze mümkinçilikleriniň açylmagyna hyzmat edýär. Şonuň üçin hem, türkmen Bitaraplygy diňe bir häzirki döwrüň üstünlikli diplomatik tejribesi däl-de, eýsem geljegiň durnukly ösüşine gönükdirilen nusgalyk ýol hökmünde hem uly ähmiýete eýedir.

Bahadyr ORAZMETOW,
Türkmenistanyň Tebigaty goramak jemgyýetiniň
Daşoguz welaýat bölüminiň hünärmeni.